استوار و سلطنت مؤيّد و برقرار ايدوكى . بيت اين آن اساس نيست كه گردد خلل پذير * لو بست الجبال « 1 » لو انشقت السماء « 2 » مضمونندن استدلال بيوريلوب . صرصر حوادث روزگار ايله صار صلمه‌دن مأمون و حفظ و صيانت قادر بىچون ايله محفوظ و مصون بر سلطنت همايون روز افزون اولدوغن ديدهء بصيرت دوربين ايله ملحوظ و منظور و كيفيّت استحكام مبانى سنه تحصيل وقوف و شعور بيور مريله كماكان تهيهء اسباب مصالحه و معاهده يه شروع و مباشرت و تلافى مافاته سعى و دقت اولنوب بوندن اقدم مرحوم درويش پاشا دام له السعادة فى دار البقاء صدارت عظمى و وكالت كبرى خدمتنده ايكن ما بينده طرح آشتى و مصالحه امرينه واسطه و نظم و انتظام مصالح مصالحه يه وسيله و رابطه اتخاذ بيوريلوب . مشار اليهه خطابا نامهء نامى خجسته فال و صحيفهء گرامى مصادقت مآل تحرير اولنوب . سدهء سما رفعت لرى خدامندن و عتبهء فلك رتبت لرينك معتمدان ذوى الاحترامندن حميده خصال پسنديده فعال جامع وجوه المعارف و الكمال محمد - بك زيد مجده و ساطتيله آستان سعادت آشيان پادشاهى و درگاه فلك اشتباه شهنشاهى صوبنه ارسال قيلنوب مجددا طرح اساس دوستى و يك جهتى خصوصى استدعا و اراده و اعادهء عهد قرار داده با بنده ابواب حسن معامله مفتوح و گشاده طوتيلوب بوندن اقدم آباء و اجداد نيكو نهادلرى سالك اولدقلرى مسلك مستقيمه سلوك و رعايت قوانين و آداب عاقبت انديشان اعاظم ملوك بيورلمش حقا و بعزة اللّه تعالى بو طريق پر توفيق و راه هدايت رفيقه ميل و توجه عالى لرى رضاى مولايه موافق و دين و دولت لرينه نافع و لايق و موجب استراحت و خوشحالى عامهء خلايق در . الى هذا الان ، بو آستان بلند آشيان ايله دوستلق و محبت معامله سنده اگر جناب سلطنت مآب سعادت انتسابلرى و اگر آباء و اجداد خلافت ايابلرى ايولكدن غيرى نسنه مشاهده ايتميوب بو دولت سرمديه ايله يك جهت و يك رنگ اولدقلرى اثناده تشويش و اختلالدن

--> ( 1 ) - اشاره به آيات 5 سورة الواقعة و 37 سورة الرحمن . ( 2 ) - اشاره به آيات 5 سورة الواقعة و 37 سورة الرحمن .